به گزارش خبرگزاری مهر به نقل از بی بی سی، «امام علی رحمان» رئیس جمهوری تاجیکستان، در اقدامی غیر معمول از طریق بلندگو با مردم ولسوالی شکی ولایت بدخشان افغانستان صحبت کرده است.
روز چهارشنبه رئیس جمهوری تاجیکستان از مناطق مرزی در امتداد آمو (رودخانه آمو) در مرز با افغانستان دیدار می‌کرد که با استقبال مردم ولسوالی شکی ولایت بدخشان افغانستان، در آن سوی مرز روبرو شد.
در ویدئویی که از روز گذشته در شبکه‌های اجتماعی همرسانی شده، شماری از مردم ولسوالی شکی در حالی که پرچم کشورهای افغانستان و تاجیکستان را در دست دارند در این سوی دریای آمو جمع شده و با استفاده از بلندگو از امام علی رحمان، رئیس جمهوری تاجیکستان که در آن سوی دریا توقف کرده استقبال می‌کنند.
مردم ولسوالی شکی ولایت بدخشان، از رئیس جمهوری تاجیکستان خواسته‌اند تا برای تهیه آب آشامیدنی، خدمات بهداشتی، تامین برق و خدمات مخابراتی این ولسوالی را کمک کند. در پاسخ، آقای رحمان به باشندگان این ولسوالی وعده همکاری داده است.
رئیس جمهوری تاجیکستان گفته است که پروژه‌های عمرانی در این طرف مرز برای افغان‌ها و برای آبادی افغان‌ها نیز هست و با ساخت نیروگاه‌های تازه، برق بیشتر نیز به افغانستان انتقال می‌یابد.